طیارہ ساز کمپنی ایئر بس نے اے 320 طیاروں کے سافٹ ویئر میں مسئلے کے بعد فوری اپ ڈیٹ کا فیصلہ کر لیا ہے جس کے باعث دنیا بھر میں تقریباً 6 ہزار طیارے متاثر ہو سکتے ہیں۔ کمپنی کے مطابق حالیہ واقعے سے معلوم ہوا کہ سولر ریڈی ایشن ڈیٹا کو نقصان پہنچا کر طیارے کے کنٹرول کو متاثر کر سکتی ہے۔
خبر رساں اداروں کے مطابق 30 اکتوبر کو میکسیکو سے نیوجرسی جانے والی ایک پرواز کے دوران طیارے کا کنٹرول کھو گیا اور یہ اچانک بلندی سے نیچے آ گیا جس کے نتیجے میں کئی مسافر زخمی ہو گئے۔
ایئر بس کے سافٹ ویئر اپ ڈیٹ کے فیصلے کے بعد امریکن ائیر لائنز، ڈیلٹا ائیر لائنز، ائیر نیوزی لینڈ اور ترکش ائیر لائنز سمیت کئی کمپنیوں نے پروازوں میں خلل کی وارننگ جاری کی۔ آسٹریلین ائیرلائن نے کہا کہ سافٹ ویئر اپ ڈیٹ کے باعث ان کی کچھ پروازیں اڑان بھرنے سے قاصر ہیں جبکہ سعودی ائیرلائنز نے بھی بعض پروازوں میں تاخیر کی تصدیق کی۔ برطانوی ایوی ایشن اتھارٹی نے بھی خدشہ ظاہر کیا کہ سافٹ ویئر اپ ڈیٹ کے فیصلے سے پروازوں کے شیڈول متاثر ہو سکتے ہیں۔
پاکستان میں بھی اے 320 طیارے موجود ہیں تاہم پی آئی اے کے ترجمان نے کہا کہ قومی ایئر لائن کے طیاروں میں مذکورہ سافٹ ویئر ورژن موجود نہیں، اس لیے تمام طیارے محفوظ ہیں اور پروازیں متاثر نہیں ہوں گی۔
واضح رہے کہ ایئر بس نے نیا سافٹ ویئر 104 ریلیز کیا تھا جس میں دوران پرواز متعدد ایئر لائنز کے طیاروں میں مسائل رپورٹ ہوئے اور کمپنی نے ہدایت دی ہے کہ تمام ایئر لائنز پرانا سافٹ ویئر دوبارہ لوڈ کریں۔