وفاقی دارالحکومت میں جاری تین بڑے عوامی منصوبے-- ٹی چوک فلائی اوور، شاہین چوک انڈر پاس اور فیض آباد انٹرچینج ری ماڈلنگ تیزی سے تکمیل کے مرحلے میں داخل ہوگئے ہیں۔ وزیرِ داخلہ محسن نقوی نے آج ان منصوبوں کا دورہ کیا اور مجموعی پیش رفت پر اظہارِ اطمینان کیا۔
دورے کے دوران وزیرِ داخلہ نے جاری تعمیراتی سرگرمیوں کا تفصیلی جائزہ لیا اور متعلقہ حکام کو ہدایت کی کہ منصوبوں کی بروقت تکمیل کے لیے تمام تر وسائل بروئے کار لائے جائیں۔ انہوں نے کہا کہ پراجیکٹس مکمل ہونے سے ٹریفک روانی میں نمایاں بہتری آئے گی اور شہریوں کو آمد و رفت میں بڑی سہولت ملے گی۔
محسن نقوی نے فیض آباد انٹرچینج پر لوپ وَن اور لوپ ٹُو کو تین لین کرنے کی ہدایت جاری کرتے ہوئے کہا کہ ٹریفک دباؤ میں نمایاں کمی لائی جائے۔ انہوں نے منصوبوں کی خوبصورتی بڑھانے کے لیے لینڈسکیپنگ اور جدید لائٹس لگانے کی بھی ہدایات دیں۔
چیئرمین سی ڈی اے محمد علی رندھاوا نے وزیرِ داخلہ کو تینوں منصوبوں کی پیش رفت پر بریفنگ دیتے ہوئے بتایا کہ ٹی چوک فلائی اوور کا تقریباً 80 فیصد کام مکمل ہو چکا ہے اور اسے دسمبر کے اوائل میں ٹریفک کے لیے کھول دیا جائے گا۔ پائلز کیپ اور گرڈرز کاسٹنگ 100 فیصد مکمل، حفاظتی دیواروں کا 75 فیصد کام مکمل، شاہین چوک انڈر پاس میں 70 گرڈرز کی لانچنگ مکمل کر لی گئی ہے جبکہ باقی گرڈرز پر کام تیز رفتاری سے جاری ہے۔
ریمپ وَن اور ریمپ ٹُو کا 100 فیصد کام مکمل، فیض آباد انٹرچینج ری ماڈلنگ میں پولز فاؤنڈیشن مکمل ہو چکے ہیں جبکہ آر سی سی والز مکمل، اسفالٹ بچھانے کا کام جاری ہے۔
وزیرِ داخلہ نے کہا کہ ٹی چوک فلائی اوور کی تکمیل سے جڑواں شہروں اور پنجاب سے آنے والے مسافروں کو بھی بڑا فائدہ پہنچے گا۔ دورے کے دوران ممبران سی ڈی اے، ڈپٹی کمشنر، ایڈیشنل ڈپٹی کمشنر اور دیگر متعلقہ افسران بھی موجود تھے۔