چاغی بلوچستان میں واقع گردی جنگل افغان مہاجر کیمپ مکمل طور پر خالی کردیا گیا۔ ضلعی انتظامیہ چاغی اور دالبندین رائفلز کی کارروائیوں کے دوران کیمپ میں رہائش پذیر تمام افغان مہاجرین کو باضابطہ رجسٹریشن کے بعد افغانستان روانہ کر دیا گیا۔
ذرائع کا کہنا ہے کہ مہاجرین کے انخلا کے بعد انتظامیہ نے کیمپ میں خالی گھروں اور دکانوں کو مسمار کرنے کا عمل بھی شروع کردیا ہے۔ موصولہ فوٹیج میں دیکھا جا سکتا ہے کہ گردی جنگل کیمپ میں خالی مکانات کی توڑ پھوڑ جاری ہے۔
انتظامیہ کے مطابق کیمپ کے تمام افغان مہاجرین کو مکمل دستاویزی کارروائی کے بعد واپس افغانستان منتقل کیا گیا۔ ذرائع کے مطابق گردی جنگل ملک کا سب سے بڑا افغان مہاجر کیمپ تھا جہاں 70 ہزار افغان مہاجرین رہائش پذیر تھے۔
تمام 70 ہزار مہاجرین کو وطن واپس بھیجا جا چکا ہے، جبکہ ضلعی انتظامیہ کے مطابق 26 نومبر 2025 سے لجّے افغان مہاجر کیمپ میں بھی کارروائیوں کا آغاز کر دیا گیا ہے۔
انتظامیہ کے مطابق تمام اقدامات ریاستی پالیسی کے تحت کیے جا رہے ہیں، جبکہ لجّے کیمپ خالی ہونے کے بعد وہاں موجود غیر قانونی ڈھانچوں کو بھی ہٹا دیا جائے گا۔