پاکستان تحریک انصاف نے اتوار کو پشاور میں ہونے والے جلسے کو کامیاب بنانے کیلیے پشاور کی تنظیم اور ممبران اسمبلی کو ٹاسک حوالے کردیا۔
تمام حلقوں سے ایک ہزارسے زائد کارکنان لانے کی ہدایت کی گئی ہے جبکہ طلبہ اور خواتین سمیت تمام ونگز کو بھی جلسہ کامیاب بنانے کیلیے ہدایات جاری کردی گئی ہیں۔
گزشتہ روز وزیرِ اعلیٰ محمد سہیل آفریدی کی زیر صدارت پشاور کی تنظیم اور پشاور سے منتخب ارکان اسمبلی و ٹکٹ ہولڈرز کا اجلاس ہوا، جس میں پشاور میں ہونے والے 7 دسمبر کے جلسے کے حوالے سے تفصیلی مشاورت کی گئی، اجلاس میں ممبران اسمبلی و پارٹی قائدین کی جانب سے مختلف تجاویز پیش کی گئیں۔
ذرائع کے مطابق اجلاس میں ہر صوبائی حلقے سے کم از کم ایک ہزار ورکرز لانے کا ٹاسک حوالے کیا گیا اور ہدایت کی گئی ہے کہ ورکرز کو متحرک کرنے کی مہم چلائی جائے، 26 نومبر کو ہونے والی دعائیہ تقریب میں قلیل کارکنوں کی تعداد پر بھی بحث کی گئی اور تلقین کی گئی کہ اس بار کسی بھی قسم کی کوتاہی برداشت نہیں کی جائے گی۔