کراچی کے علاقے نیپا پل کے قریب نالے میں گر کر جاں بحق ہونے والے تین سالہ بچے کی لاش ملنے کے واقعے کے بعد ایس ایس پی ایسٹ فرخ ملک نے لاش کی تلاش میں کردار ادا کرنے والے بچے تنویر گوپانگ کو نقد انعام اور پھولوں کا تحفہ پیش کیا۔
ایک جانب ایس ایس پی ایسٹ بچے تنویر کو انعام سے نواز رہے جبکہ دوسری جانب ترجمان بلدیہ عظمیٰ کراچی دانیال سیال نے دعویٰ کیا ہےکہ گزشتہ رات یہ افسوسناک واقعہ پیش آیا جب معصوم بچہ نالے میں گر گیا تھا۔ اطلاع ملتے ہی ریسکیو ٹیمیں اور بلدیہ عظمیٰ کا عملہ موقع پر پہنچا اور تلاش کا عمل شروع کردیا۔
ترجمان کے مطابق ریسکیو ٹیموں کو چند شرپسند عناصر کی جانب سے مزاحمت کا سامنا بھی کرنا پڑا جس کے باعث سرچ آپریشن میں تاخیر ہوئی تاہم ٹیموں نے مشکلات کے باوجود کام جاری رکھا اور بچے کی لاش نالے سے برآمد ہوئی۔
انہوں نے بعض افراد کی جانب سے پھیلائی جانے والی اس افواہ کی سختی سے تردید کی کہ بچے کی لاش ریسکیو ٹیموں نے نہیں بلکہ کسی کچرا چننے والے نے ڈھونڈی ہے۔ ترجمان نے واضح کیا کہ یہ دعویٰ سراسر جھوٹ ہے بچے کی لاش ریسکیو ٹیموں نے ہی تلاش کی مگر اس وقت تک وہ جاں بحق ہوچکا تھا۔
واضح رہے کہ گزشتہ روز نیپا چورنگی میں تین سالہ بچہ ابراہیم نالےمیں گر کر جاں بحق ہو گیا تھا جس کی لاش پندرہ گھنٹے بعد ملی تھی۔