چیف جسٹس لاہور ہائیکورٹ عالیہ نیلم نے آئی جی پنجاب کو ہدایت کی ہے کہ وہ کم عمر بچوں کو ڈرائیونگ کرنے پر گرفتار کرنے سے فوری طور پر باز رہیں اور پہلے آگاہی مہم چلائی جائے۔
وزیراعلیٰ پنجاب مریم نواز شریف نے بھی ٹریفک قوانین کی خلاف ورزی کرنے والے کم عمر طلبہ کو ہتھکڑیاں لگانے پر سخت برہمی کا اظہار کیا۔ وزیراعلیٰ نے واضح کیا کہ بچوں کو گرفتار کرنے کے بجائے انہیں ٹریفک قوانین کے بارے میں آگاہی فراہم کرنا زیادہ مؤثر اقدام ہوگا۔
صوبے بھر میں ٹریفک پولیس کو ہدایت کی گئی ہے کہ عوام اور خاص طور پر طلبہ کے لیے ہفتہ آگاہی منایا جائے۔ پہلی خلاف ورزی کی صورت میں، جیسے ہیلمٹ نہ پہننا، صرف وارننگ چالان جاری کیا جائے گا۔
علاوہ ازیں، وزیراعلیٰ نے 16 سال کے بچوں کے لیے سمارٹ کارڈ اور موٹرسائیکل ڈرائیونگ لائسنس کے اجراء کا اصولی فیصلہ بھی کیا ہے۔ نئے اقدامات کے تحت ٹریفک کی نگرانی کے لیے پہلی بار ڈرون اور باڈی کیم کا استعمال شروع کیا جائے گا۔
مریم نواز شریف نے والدین پر بھی زور دیا کہ وہ بچوں کو ٹریفک قوانین کے بارے میں بھرپور تعلیم دیں تاکہ کم عمر طلبہ محفوظ اور ذمہ دار ڈرائیونگ کرسکیں۔