راولپنڈی میں آج جنرل ہیڈ کوارٹرز میں سعودی عرب کی رائل سعودی لینڈ فورسز کے کمانڈر لیفٹیننٹ جنرل فہد بن سعود الجوہانی نے چیف آف آرمی اسٹاف فیلڈ مارشل سید عاصم منیر، NI(M), HJ سے ملاقات کی۔
ملاقات میں باہمی دلچسپی کے امور، خطے کی سیکیورٹی صورتحال اور دفاعی تعاون بڑھانے کے مختلف پہلوؤں پر تفصیلی تبادلۂ خیال کیا گیا۔ دونوں رہنماؤں نے پاکستان اور سعودی عرب کے درمیان دیرینہ اور برادرانہ عسکری تعلقات کو مزید مضبوط بنانے کے عزم کا اعادہ کیا۔
چیف آف آرمی اسٹاف نے پاکستان اور سعودی عرب کے درمیان مضبوط دفاعی تعاون پر اطمینان کا اظہار کرتے ہوئے تربیت، استعداد کار میں اضافے اور انٹیلی جنس شیئرنگ کے شعبوں میں تعاون جاری رکھنے کی ضرورت پر زور دیا۔ کمانڈر رائل سعودی لینڈ فورسز نے پاک فوج کی پیشہ ورانہ صلاحیتوں کو سراہا اور خطے میں امن و استحکام کے لیے پاکستان کے مثبت کردار کی تعریف کی۔
معزز مہمان کی آمد پر جی ایچ کیو میں انہیں گارڈ آف آنر پیش کیا گیا۔