اسلام آباد میں وزیر داخلہ محسن نقوی اور برطانوی ہائی کمشنر جین میریٹ کے درمیان اہم ملاقات ہوئی جس میں پاکستان نے شہزاد اکبر اور عادل راجہ کی حوالگی کا باضابطہ مطالبہ کرتے ہوئے ان کے ایکسٹراڈیشن کے کاغذات برطانوی حکام کے حوالے کر دیے۔
ملاقات میں پاک، برطانیہ تعلقات، سیکیورٹی تعاون، باہمی دلچسپی کے امور اور برطانیہ میں غیر قانونی طور پر مقیم پاکستانیوں کی وطن واپسی پر تفصیلی گفتگو ہوئی۔ اس موقع پر وفاقی سیکریٹری داخلہ محمد خرم آغا اور دیگر متعلقہ افسران بھی موجود تھے۔
وزیر داخلہ محسن نقوی نے کہا کہ شہزاد اکبر اور عادل راجہ پاکستان میں انتہائی مطلوب ہیں لہٰذا برطانیہ انہیں فوری طور پر پاکستان کے حوالے کرے۔ انہوں نے دونوں افراد کے خلاف ٹھوس شواہد بھی فراہم کیے۔
محسن نقوی نے کہا کہ آزادی اظہار کا مکمل احترام کرتے ہیں تاہم فیک نیوز اور ریاست مخالف پروپیگنڈا کسی بھی ملک کے لیے تسلیم نہیں کیا جا سکتا۔ بیرون ملک بیٹھ کر ریاست اور اداروں کے خلاف ہرزہ سرائی کی اجازت کوئی ریاست نہیں دیتی۔
انہوں نے کہا کہ پاکستان مخالف پروپیگنڈا کرنے والوں کی وطن واپسی میں برطانوی تعاون کا خیرمقدم کریں گے۔ وزارت داخلہ نے وزارت خارجہ کے ذریعے بھی حوالگی کا عمل باضابطہ طور پر شروع کر دیا ہے۔