وفاقی وزیر داخلہ محسن نقوی اور وفاقی وزیر برائے سمندر پار پاکستانیز چوہدری سالک حسین کی زیر صدارت اہم اجلاس منعقد ہوا، جس میں بیرونِ ملک سفر سے متعلق جعلی دستاویزات، ایجنٹ مافیا، اور امیگریشن نظام میں موجود خامیوں پر تفصیلی غور کیا گیا۔
اجلاس میں جعلی ویزوں پر بیرون ملک جانے والے افراد کے خلاف شکنجہ مزید سخت کرنے اور پروٹیکٹر کے اجراء کے نظام کو فول پروف بنانے کا فیصلہ کیا گیا۔ مسافروں کی سہولت کے لیے امیگریشن سسٹم میں بھی فوری اصلاحات لانے کی ہدایات جاری کی گئیں۔
اجلاس میں سات روز میں حتمی سفارشات پیش کرنے کا حکم دیا گیا، جعلی ویزوں اور ایجنٹ مافیا کے خلاف موثر کریک ڈاؤن کی ہدایات کی گئی، غیر قانونی امیگریشن کی روک تھام کے لیے جنوری سے اسلام آباد میں اے آئی بیسڈ ایپ کا پائلٹ پراجیکٹ شروع کیا جائے گا۔ اے آئی ایپ کے ذریعے سفر کے قابل اور نااہل مسافروں کی پیشگی نشاندہی ممکن ہوگی۔ ڈیپورٹ شدہ افراد کے پاسپورٹ منسوخ ہونے کے بعد انہیں دوبارہ ویزہ نہ دینے کی پالیسی کو یقینی بنایا جائے گا۔ تمام مسافروں کے لیے یکساں انٹرنیشنل ڈرائیونگ لائسنس نیشنل پولیس بیورو سے جاری ہوگا۔ گرین پاسپورٹ کی درجہ بندی بہتر بنانے کے لیے دیگر ممالک سے رابطے جاری ہیں۔
وزیر داخلہ محسن نقوی اور وفاقی وزیر سالک حسین نے کہا کہ جعلی ویزوں کے کاروبار میں ملوث مافیا کے خلاف زیرو ٹالرنس اپنائی جائے گی۔ غلط طریقوں سے بیرون ملک جانے والے افراد ملک کی ساکھ متاثر کر رہے ہیں۔ امیگریشن ریفارمز کا مقصد عوام کو سہولت دینا اور پاکستان کی عالمی ساکھ بہتر بنانا ہے۔ پروٹیکٹر کا شفاف اور جدید نظام وقت کی ضرورت ہے۔ لیبر ویزے پر جانے والے افراد کے پاس مستند اور مکمل دستاویزات کا ہونا لازمی قرار دیا گیا۔ وزارت اوورسیز پاکستانیز، پروٹیکٹر اور امیگریشن سسٹم کی بہتری کے لیے وزارت داخلہ سے مکمل تعاون کرے گی۔
اجلاس میں زیرِ غور امور میں جعلی دستاویزات، جعلی ویزوں اور غیر قانونی تارکین وطن کے خلاف اقدامات کا جائزہ، ای ڈرائیونگ لائسنس, پروٹیکٹر اسٹامپ, اور امیگریشن سسٹم میں بہتری پر تفصیلی تبادلہ خیال شامل تھا۔
اجلاس میں سیکریٹری داخلہ، سیکریٹری اوورسیز پاکستانیز، چیئرمین نادرا، ڈی جی ایف آئی اے، ڈی جی پاسپورٹ اینڈ امیگریشن سمیت تمام متعلقہ اداروں کے نمائندگان نے شرکت کی۔
اجلاس میں کیے گئے فیصلوں کا مقصد بیرون ملک سفر کرنے والے پاکستانیوں کو سہولت فراہم کرنے کے ساتھ جعلی دستاویزات اور انسانی اسمگلنگ کے خلاف بھرپور کریک ڈاؤن کو یقینی بنانا ہے۔