وزیرِ اعلیٰ خیبر پختونخوا سہیل آفریدی نے گورنر راج کے ممکنہ نفاذ کے حوالے سے انتہائی سخت ردعمل دیتے ہوئے کہا ہے کہ اگر مرکز نے گورنر راج لگانا ہے تو ”آج ہی لگا دیں“، وہ اس فیصلے کا بھرپور مقابلہ کریں گے۔
وزیرِ اعلیٰ سہیل آفریدی نے اپنے بیان میں کہا کہ گورنر راج کل لگانا ہے تو آج ہی لگا دیں، پھر میں فرنٹ فٹ پر کھیلوں گا۔ یہ صورتحال سنبھال نہیں پائیں گے۔ 78 سال میں پہلی مرتبہ ایک وزیر اعلیٰ قبائلی علاقے سے آیا ہے، پھر یہ قبائلیوں کا غصہ بھی دیکھیں گے۔
انہوں نے مزید الزام عائد کیا کہ حکومت 28 ویں آئینی ترمیم کی حمایت کے لیے لوگوں کو دباؤ اور دھمکیوں کا نشانہ بنا رہی ہے۔ وزیرِ اعلیٰ کا کہنا تھا کہ وہ ہر قسم کے دباؤ کا مقابلہ کرنے کے لیے مکمل طور پر تیار ہیں۔
سہیل آفریدی نے وفاقی وزرا کی حالیہ پریس کانفرنس کو شدید تنقید کا نشانہ بناتے ہوئے اسے غیر انسانی، غیر اخلاقی اور غیر قانونی قرار دیا ہے۔
انہوں نے کہا کہ وفاقی وزراء کا طرزِ عمل نہ صرف عوامی جذبات کو بھڑکانے کا سبب بن رہا ہے بلکہ یہ رویہ جان بوجھ کر حالات کو خراب کرنے کے مترادف ہے۔
سہیل آفریدی کا کہنا تھا کہ حکومت کو سنجیدگی اور ذمہ داری کا مظاہرہ کرنا چاہیے، جبکہ ایسی بیانات اور پریس کانفرنسز عوام میں اشتعال اور انتشار پیدا کرنے کا باعث بنتی ہیں۔ انہوں نے مطالبہ کیا کہ حکومت اس قسم کے غیر ذمہ دارانہ رویے کا نوٹس لے اور ملکی حالات کو مزید کشیدہ ہونے سے بچایا جائے۔
سیاسی ماحول میں بڑھتی کشیدگی کے بعد یہ بیان سیاسی حلقوں میں نئی بحث کا سبب بن گیا ہے، اور صوبے میں آئینی صورتحال سے متعلق سوالات دوبارہ اٹھنے لگے ہیں۔