اسلام آباد کی ڈسٹرکٹ اینڈ سیشن کورٹ نے پاکستان تحریک انصاف کے رہنما مرزا شہزاد اکبر کو متعدد بار طلبی کے باوجود پیش نہ ہونے پر اشتہاری قرار دیتے ہوئے وارنٹِ گرفتاری جاری کر دیے۔
عدالتی حکمنامے کے مطابق شہزاد اکبر کے خلاف مقدمے کا چالان عدالت میں جمع کرایا جا چکا ہے تاہم وہ بارہا طلب کیے جانے کے باوجود پیش نہ ہوئے، جس پر یہ فیصلہ سنایا گیا۔
مرزا شہزاد اکبر کے خلاف سوشل میڈیا پلیٹ فارم ایکس پر ریاست مخالف اور متنازع بیانات کے الزام میں نیشنل سائبر کرائم انویسٹی گیشن ایجنسی نے جولائی 2025 میں مقدمہ درج کیا تھا۔
حکومتی ریکارڈ کے مطابق شہزاد اکبر پی ٹی آئی حکومت کے خاتمے کے بعد برطانیہ منتقل ہو چکے ہیں جہاں کی وہ شہریت بھی رکھتے ہیں۔ کچھ عرصہ قبل لندن میں ان پر تیزاب گردی کا حملہ بھی ہوا تھا۔
وفاقی حکومت پہلے ہی برطانیہ سے شہزاد اکبر اور عادل راجہ کی حوالگی کا مطالبہ کر چکی ہے۔