کراچی سمیت صوبہ سندھ کے مختلف شہروں میں آج یوم ثقافت سندھ منایا جا رہا ہے۔
سندھی ٹوپی پہنے اور اجرک اوڑھے نواجوان ٹولیوں کی صورت میں ریلیوں کی شکل میں شہر کی شاہراہوں پر نکل آئے ہیں، جبکہ مختلف چوراہوں پر میوزک کے ساتھ رقص بھی کررہے ہیں.
پولیس نے کراچی پریس کلب جانے والے تمام راستوں کو کنٹینرز لگا کر بند کردیا ہے، جبکہ ٹریفک پولیس نے ٹریفک کو متبادل راستوں کی جانب رواں دواں رکھنے کے لیے کوشاں ہے۔
کندھ کوٹ اور نوابشاہ میں بھی مختلف سیاسی سماجی تنظیموں کی جانب سے سندھی ثقافت کے حوالے سے ریلیاں نکالی گئیں.
کندھ کوٹ ثقافت ڈے کے حوالے سے مرکزی تقریب کندھ کوٹ پریس کلب میں منعقد کی گئی ہے، جہاں نوجوان اور بچے قومی ثقافتی گیتوں پر رقص کر رہے ہیں۔
نواب شاہ میں مست پروازی کی جانب سے ہائوسنگ سوسائٹی سے ریلی نکالی گئی جو نواب شاہ پریس کلب تک پہنچی، جہاں صوفی فقیرو نے ڈھول اور شہنائیوں پر خوبصورت انداز میں رقص کرکے محبت کا اظہار کیا۔
ریلی کے شرکا کا کہنا تھا کہ ثقافت کا دن ہمارے لیے عید سے کم نہیں ہوتا، ان کا مزید کہنا تھا کہ انسان کہیں بھی ھو لیکن اپنی ثقافت سے ہی پہچانا جاتا ہے۔