سعودی عرب کے مختلف شہروں میں گرج چمک کے ساتھ طوفانی بارشوں اور تیز ہواؤں نے شدید نقصان پہنچایا ہے۔ شہر ینبع اور ربیغ میں نشیبی علاقوں میں پانی جمع ہوگیا متعدد عمارتوں کی چھتیں گر گئیں اور شیشے ٹوٹنے سے کئی گاڑیاں ملبے تلے دب گئیں۔
مدینہ منورہ اور ملحقہ علاقوں میں بھی موسلادھار بارش ہوئی جس سے صحرائی وادیوں اور نشیبی علاقوں میں پانی جمع ہو گیا۔ شدید بارش کے باعث شہر کے شہری اور تعلیمی ادارے متاثر ہوئے جس کے پیش نظر جدہ اور ربیغ کے اسکول اور کالجز آج بند رکھے گئے اور تمام کلاسز آن لائن منتقل کی گئیں۔
محکمہ شہری دفاع نے شہریوں اور زائرین کو غیر ضروری سفر سے گریز کرنے کی ہدایت کی ہے جبکہ مسجد نبویؐ کے اطراف اور صحن میں بھی بارش کے مناظر زائرین نے عقیدت کے ساتھ محفوظ کیے۔
محکمۂ موسمیات کے مطابق آئندہ چند گھنٹوں تک وقفے وقفے سے بارش کا امکان ہے جس سے موسم مزید سرد ہوگا۔ شہری اور حکام دونوں کو احتیاط برتنے کی ہدایت کی گئی ہے تاکہ انسانی جانوں اور املاک کا نقصان کم سے کم ہو۔