افغانستان میں طالبان حکام نے برطانوی ٹی وی سیریز پیکی بلائنڈرز سے متاثرہ لباس پہننے پر چار نوجوانوں کو گرفتار کر لیا۔
طالبان کی وزارتِ امر بالمعروف و نہی عن المنکر کے ترجمان سیف الاسلام خیبر کے مطابق کارروائی ہرات کے جبرایل ٹاؤن شپ میں کی گئی جہاں نوجوان لانگ کوٹ، فلیٹ کیپ اور سیریز کے شیلبی خاندان سے مشابہ لباس پہنے ہوئے تھے۔ طالبان کا کہنا ہے کہ نوجوان غیر ملکی ثقافت کو فروغ دے رہے تھے جو ان کے مطابق اسلامی اقدار اور افغان ثقافت کے منافی ہے۔
افغان میڈیا کے مطابق گزشتہ چند دنوں سے سوشل میڈیا پر ان نوجوانوں کی تصاویر زیرِ گردش تھیں۔ ایک یوٹیوب انٹرویو میں نوجوانوں نے بتایا تھا کہ وہ یہ فیشن شو کی وجہ سے پسند کرتے ہیں اور مقامی لوگوں نے اس پر مثبت ردعمل بھی دیا۔
طالبان اس سے قبل بھی متعدد افراد کو ڈریس کوڈ کی مبینہ خلاف ورزیوں پر گرفتار کر چکے ہیں۔