اگر آپ سوشل میڈیا پر دیگر خواتین کی تصاویر کو لائیک کرتے ہیں تو یہ اقدام آپ کی شادی کے لیے خطرناک ثابت ہو سکتا ہے۔
ترکی کی عدالت نے ایک اہم فیصلے میں کہا ہے کہ دیگر خواتین کی سوشل میڈیا پوسٹس کو لائیک کرنے کو ازدواجی اعتماد کو نقصان پہنچانے والے اقدامات کے طور پر دیکھا جا سکتا ہے اور اسے طلاق کے مقدمے میں ثبوت کے طور پر استعمال کیا جا سکتا ہے۔
یہ کیس قیصری شہر سے تعلق رکھنے والے ایک جوڑے سے متعلق تھا جہاں شوہر اور بیوی نے طلاق کے لیے درخواست دائر کی تھی۔ بیوی نے الزام لگایا کہ شوہر دیگر خواتین کی پوسٹس پر مسلسل لائیکس دے کر اس کی وفاداری اور ازدواجی اعتماد کو نقصان پہنچا رہا ہے جبکہ شوہر نے بیوی پر حسد اور والد کی توہین کا الزام عائد کیا۔
عدالت نے اپنے فیصلے میں شوہر کو زیادہ ذمہ دار قرار دیا اور اسے بیوی کو زرتلافی ادا کرنے کا حکم دیا۔ شوہر کے سوشل میڈیا لائیکس کو مقدمے میں بطور ثبوت استعمال کیا گیا۔
ایپلیٹ سپریم کورٹ نے بھی پہلے فیصلے کو برقرار رکھا اور کہا کہ شوہر کی جانب سے دیگر خواتین کی تصاویر کو لائیک کرنا ازدواجی اعتماد کو نقصان پہنچاتا ہے جسے نظرانداز نہیں کیا جا سکتا۔