وزیراعظم کے کوآرڈینیٹر برائے خیبر پختونخوا اختیار ولی خان نے کہا ہے کہ محمود اچکزئی کو بات چیت کا اختیار دینا بانی پی ٹی آئی عمران خان کا اپنی ہی جماعت پر عدم اعتماد ظاہر کرتا ہے۔
ان کا کہنا تھا کہ جب بانی پی ٹی آئی کا مقصد پورا ہوجائے گا تو وہ ممکن ہے محمود اچکزئی کو ہری جھنڈی دکھا کر خود پیچھے ہٹ جائیں، کیونکہ عمران خان لوگوں کو استعمال کرکے بعد میں نظر انداز کر دیتے ہیں۔
اختیار ولی خان کے مطابق قومی اتحاد اور ہم آہنگی کے لیے حکومت محمود اچکزئی سمیت کوٹ لکھپت جیل میں قید افراد سے بھی بات چیت کے لیے تیار ہے۔ انہوں نے کہا کہ وزیراعظم کا مؤقف واضح ہے کہ قومی یکجہتی کے لیے کسی سے بھی مذاکرات ہوسکتے ہیں۔
انہوں نے مزید کہا کہ ماضی میں اپوزیشن لیڈر کی حیثیت سے بھی شہباز شریف نے میثاقِ معیشت کی پیشکش کی تھی۔ اختیار ولی خان کا کہنا تھا کہ اگر اپوزیشن کا لہجہ مثبت اور سنجیدہ ہوگا تو مذاکرات انہیں بہت کچھ دے سکتے ہیں، تاہم غیر سنجیدہ اور نامناسب زبان استعمال کرنے سے بات آگے نہیں بڑھے گی۔