آئی ایس پی آر کے مطابق باجوڑ کے علاقے خار میں فتنۃ الخوارج کے خلاف آپریشن کے دوران جامِ شہادت نوش کرنے والے میجر عادل زمان شہید کی نمازِ جنازہ آج پشاور گیریژن میں ادا کی گئی۔
نمازِ جنازہ میں فیلڈ مارشل سید عاصم منیر، نشانِ امتیاز (ملٹری)، ہلالِ جرات، چیف آف آرمی اسٹاف و چیف آف ڈیفنس فورس، وزیرِ داخلہ، کمانڈر پشاور کور، اعلیٰ عسکری و سول حکام اور بڑی تعداد میں عوام نے شرکت کی۔
اس موقع پر فیلڈ مارشل سید عاصم منیر نے میجر عادل زمان شہید کی عظیم قربانی کو خراجِ عقیدت پیش کرتے ہوئے کہا کہ پاک فوج کے شہداء قوم کا فخر ہیں اور ان کی قربانیاں ہمیشہ یاد رکھی جائیں گی۔ انہوں نے شہید کے درجات کی بلندی اور اہلِ خانہ کے لیے صبر و استقامت کی دعا کی۔
آئی ایس پی آر کے مطابق میجر عادل زمان شہید نے اگلے مورچوں سے قیادت کرتے ہوئے فرض کی ادائیگی میں جان قربان کی۔ پاک افواج ملک سے دہشت گردی کے خاتمے کے عزم پر قائم ہیں اور ایسی قربانیاں قوم کے حوصلے مزید مضبوط کرتی ہیں۔
شہید کو مکمل فوجی اعزاز کے ساتھ ان کے آبائی شہر ڈیرہ اسماعیل خان میں سپردِ خاک کیا جائے گا۔
بعد ازاں فیلڈ مارشل نے سی ایم ایچ پشاور کا دورہ کیا اور آپریشن میں زخمی ہونے والے افسران و جوانوں کی عیادت کرتے ہوئے ان کی بہادری اور ثابت قدمی کو سراہا۔