پاکستان ریلویز کے فریٹ سیکٹر نے شاندار کارکردگی کا مظاہرہ کرتے ہوئے صرف چھ ماہ کے دوران 17 ارب روپے کی ریکارڈ آمدن حاصل کرلی ہے۔
وزیرِ ریلوے محمد حنیف عباسی کے مطابق ہڑتال کے باوجود نومبر اور دسمبر میں فریٹ سیکٹر سے مسلسل تین، تین ارب روپے سے زائد ریونیو حاصل کیا گیا، جو ادارے کی مضبوط بحالی کا واضح ثبوت ہے۔
وزیرِ ریلوے کا کہنا تھا کہ مالی سال کے اختتام تک صرف فریٹ سیکٹر سے 38 ارب روپے سے زائد آمدن حاصل ہونے کی توقع ہے، جبکہ سال 2026 میں پاکستان ریلویز پہلی بار ایک کھرب روپے آمدن والا قومی ادارہ بن جائے گا۔
محمد حنیف عباسی نے کہا کہ 2026 کے اختتام تک پاکستان ریلویز کی تمام ٹرینوں کو اپ گریڈ کر دیا جائے گا، جس سے مسافروں کو جدید اور آرام دہ سفری سہولیات میسر آئیں گی۔ انہوں نے مسافروں کو یقین دلایا کہ سفر کو محفوظ ترین بنایا جائے گا اور بہترین سفری تجربہ فراہم کیا جائے گا۔
وزیرِ ریلوے نے مزید بتایا کہ سال 2026 میں ٹرینوں میں جدید کیمرے نصب کیے جائیں گے اور پاکستان ریلویز کی مکمل ڈیجیٹائزیشن عمل میں لائی جائے گی۔ ان کا کہنا تھا کہ ریلوے پولیس کو جدید تربیت فراہم کی جا چکی ہے تاکہ مسافروں کو دورانِ سفر تحفظ اور اعتماد کا احساس ہو۔