بنگلا دیش کے الیکشن کمیشن نے کہا ہے کہ فروری میں ہونے والے بنگلا دیش کے 13ویں عام انتخابات میں تقریبا دو ہزار امیدوار حصہ لیں گے۔ الیکشن کمیشن نے منگل کو کاغذاتِ نامزدگی جمع کرانے، جانچ پڑتال، اپیلوں، دستبرداری اور امیدواروں کی حتمی فہرست مکمل ہونے کے بعد تازہ اعداد و شمار جاری کر دیئے ہیں۔
دستبرداری کی آخری تاریخ کے بعد ایک سرکاری اہلکار نے تصدیق کی کہ اس وقت ملک کے 300 میں سے 298 حلقوں میں 1,967 امیدوار انتخابی میدان میں موجود ہیں۔ باقی دو حلقوں کی فہرستیں حتمی ہونے کے بعد امیدواروں کی مجموعی تعداد میں مزید اضافہ متوقع ہے۔
الیکشن کمیشن کے مطابق ان دو حلقوں میں حلقہ بندی سے متعلق قانونی تنازع کے باعث امیدواروں کی دستبرداری کی آخری تاریخ 26 جنوری تک بڑھا دی گئی تھی۔
کمیشن نے بتایا کہ 12 فروری کو ہونے والے عام انتخابات کے لیے 69 ریٹرننگ افسران سے تقریبا 3 ہزار کاغذاتِ نامزدگی وصول کیے گئے تھے۔واضح رہے کہ الیکشن کمیشن نے گزشتہ ماہ اعلان کیا تھا کہ اگست 2024 میں سابق وزیرِ اعظم شیخ حسینہ کے مستعفی ہونے اور ملک چھوڑنے کے بعد ہونے والے اس پہلے عام انتخاب کے لیے 127 ملین سے زائد ووٹرز رجسٹر کیے گئے ہیں۔