برطانیہ نے ایران اور امریکا کے درمیان بڑھتی ہوئی کشیدگی کے تناظر میں قطر میں دفاعی مقاصد کے لیے لڑاکا طیارے تعینات کر دیے ہیں۔ برطانوی فضائیہ نے قطر میں چار ٹائفون لڑاکا طیارے بھیجے، جس کا مقصد خطے میں موجودہ حالات کے پیش نظر دفاعی تیاری کرنا بتایا گیا ہے۔
برطانوی وزارت دفاع کے مطابق یہ تعیناتی مکمل طور پر حفاظتی اور دفاعی نقطہ نظر سے کی گئی ہے۔
گزشتہ روز صدر ٹرمپ نے ائیر فورس ون میں صحافیوں سے بات کرتے ہوئے کہا تھا کہ امریکی افواج کی بڑی تعداد ایران کی جانب روانہ ہے اور خطے میں جہاز بھیجے جا رہے ہیں، جبکہ ایران کے قریب احتیاطی تدابیر اختیار کی جا رہی ہیں۔ صدر نے یہ بھی واضح کیا کہ اگر ایران جوہری پروگرام دوبارہ شروع کرتا ہے تو امریکا مناسب جواب دے گا۔