وفاقی اور سندھ حکومت کے ساتھ مذاکرات کے باوجود گڈز ٹرانسپورٹرز کے مطالبات پر تاحال کوئی حتمی پیش رفت نہ ہو سکی جس کے باعث مال بردار گاڑیوں کے مالکان اور ڈرائیورز کی ہڑتال چوتھے روز میں داخل ہوگئی۔
گڈز ٹرانسپورٹرز کے مطابق وفاقی اور سندھ حکومت کے نمائندوں کے ساتھ مطالبات کے حوالے سے تفصیلی مذاکرات کیے گئے، تاہم فریقین کے درمیان تاحال کسی حتمی نتیجے پر اتفاق نہیں ہو سکا۔
ٹرانسپورٹرز نے واضح کیا ہے کہ مطالبات تسلیم کیے جانے تک ہڑتال ختم نہیں کی جائے گی اور احتجاج کا سلسلہ جاری رہے گا۔
گڈز ٹرانسپورٹرز کے رہنما ملک شہزاد اعوان کا کہنا ہے کہ حکومت کے ساتھ مذاکرات جاری ہیں، تاہم مطالبات پر عملی پیش رفت نہ ہونے کے باعث ڈیڈ لاک برقرار ہے۔
ملک شہزاد اعوان نے کہا کہ ٹرانسپورٹرز اپنے مطالبات کی منظوری تک احتجاج جاری رکھنے کے فیصلے پر قائم ہیں، حکومت سے مطالبات پر عملی اقدامات کی توقع ہے۔