بھارتی ریاست اتر پردیش میں ایک 9 سالہ تعلیمی تعلق کے بعد ہونے والی شادی اپنے آغاز کے صرف دو ماہ میں ایک دردناک انجام کو پہنچی جب بیوی نے اپنے شوہر کو والدین اور بھائی کے ساتھ مل کر قتل کر دیا۔
واقعے کے مطابق جیوتی اور مقتول جتیندر کمار یادو کی شادی 25 نومبر 2025 کو ہوئی تھی۔ شادی کے چند ہفتوں بعد ہی ان کے تعلقات میں تلخی پیدا ہوگئی جس کی بنیادی وجہ رقم کا تنازع تھا۔ الزام ہے کہ جتیندر نے بیوی کے بینک اکاؤنٹ سے 20,000 روپے نکالے جسے وہ آن لائن جوئے میں ہار گیا اور اس سے دونوں کے درمیان بار بار جھگڑے شروع ہو گئے۔
26 جنوری کو جب جیوتی نے اس رقم کے بارے میں شوہر سے پوچھ گچھ کی تو بات ہاتھا پائی تک جا پہنچی۔ اس موقع پر جیوتی نے اپنے والد کالی چرن، والدہ چمیلی اور بھائی دیپک کو گھر بلا لیا۔ پولیس کے مطابق تصادم کے دوران والدین اور بھائی نے جتیندر کے ہاتھ پاؤں پکڑ کر اسے بے بس کر دیا جبکہ جیوتی نے اس کا گلا گھونٹ کر قتل کر دیا۔
قتل کے بعد ملزمان نے لاش کو خودکشی کا رنگ دینے کی کوشش کی اور مفلر سے باندھ کر لٹکا دیا۔ پڑوسیوں کو اطلاع دی گئی کہ جتیندر نے خود کو پھانسی لگا لی۔ پولیس جب موقع پر پہنچی تو ابتدائی طور پر اسے خودکشی کا معاملہ سمجھا گیا۔
تاہم مقتول کے بھائی اجے کمار کی شکایت کے بعد پولیس نے مقدمہ درج کر کے پوسٹ مارٹم کروایا جس میں ثابت ہوا کہ جتیندر کی موت گلا دبانے سے ہوئی نہ کہ پھانسی لگنے سے۔ اس کے بعد پولیس نے کیس کو قتل میں تبدیل کر کے تحقیقات تیز کر دیں۔
تفتیش کے دوران بیوی جیوتی نے اپنے جرم کا اعتراف کیا اور بتایا کہ مالی مسائل اور آن لائن جوئے کے تنازع کی وجہ سے جھگڑے شدت اختیار کر گئے، جس پر اس نے واقعے کے دن اپنے گھر والوں کو شامل کیا۔