دنیا بھر میں انسانی اسمگلنگ کے مکروہ دھندے میں بھارتی اسمگلرز کے ملوث ہونے کے شواہد سامنے آگئے ہیں۔ امریکی محکمہ انصاف نے بھارتی اسمگلرز کی منظم جرائم پیشہ سرگرمیوں کو بے نقاب کرتے ہوئے انسانی اسمگلنگ میں ملوث ایک اور بھارتی شہری کو امریکی عدالت سے سزا سنا دی ہے۔
ٹائمز آف انڈیا کے مطابق گزشتہ دو برس کے دوران ایک لاکھ سے زائد بھارتی شہری امریکا میں غیرقانونی داخلے کی کوشش کے دوران گرفتار ہوچکے ہیں، جو بھارتیوں میں غیرقانونی امیگریشن کے بڑھتے رجحان کو ظاہر کرتا ہے۔
امریکی حکام کے مطابق انسانی اسمگلنگ میں ملوث بھارتی شہری شیوم لنو درجنوں افراد کو غیرقانونی طور پر امریکا داخل کرانے میں ملوث رہا، جبکہ وہ گزشتہ برس انسانی اسمگلنگ کے متعدد غیرقانونی آپریشنز کا بھی حصہ رہا۔
ماہرین کے مطابق بھارتی شہریوں کی غیرقانونی سرگرمیاں عالمی سیکیورٹی کے لیے خطرہ بنتی جا رہی ہیں۔ میزبان ممالک میں بھارتی شہریوں کے بڑھتے جرائم نے مودی حکومت کے ترقی اور خوشحالی کے بیانیے کی حقیقت کو بے نقاب کردیا ہے۔
رپورٹس کے مطابق بھارتی جرائم پیشہ عناصر عالمی سطح پر انسانی اسمگلنگ، جعلی ڈگری نیٹ ورکس اور دیگر سنگین جرائم میں ملوث پائے جا رہے ہیں، جس کے باعث امریکا، آسٹریلیا اور یورپ سمیت کئی ممالک سخت اقدامات پر مجبور ہوگئے ہیں۔