پولینڈ میں موسم سرما کے آغاز سے اب تک شدید سردی سے 38 اموات ریکارڈ کی جاچکی ہیں۔
پولش ریڈیو کی رپورٹ کے مطابق پولینڈ کے نائب وزیر داخلہ و انتظامیہ ویزلاف شچپانسکی نے پیر کو صحافیوں کے ساتھ گفتگو میں بتایا کہ ملک میں شدید سردی کی لہر عروج پر ہے جس کے دوران اب تک 38 اموات اور ہائپوتھرمیا کے درجنوں کیسز کی تصدیق ہوچکی ہے۔
انہوں نے کہا کہ متروک عمارتوں میں مقیم افراد کو شدید سردی کی لہر سے زیادہ خطرہ ہے، اس لیے ایسے افراد فوری طور پر زیادہ گرم مقامات پر منتقل ہو جائیں۔ انہوں نے خبردار کیا کہ آنے والی رات پولینڈ میں موسم سرما کی سرد ترین رات ہوسکتی ہے اور درجہ حرارت منفی 38 ڈگری سینٹی گریڈ تک گرسکتا ہے۔
پولینڈ میں شدید سردی کی لہر کے باعث تین صوبوں میں اسکول بند کرنے کا اعلان کیا گیا ہے۔ دارالحکومت وارسا اور راڈوم شہر میں پنا گاہیں اور ریلوے اسٹیشن ساری رات کھلے رکھنے کا اعلان کیا گیا ہے تاکہ شدید سردی میں لوگ وہاں پناہ لے سکیں۔
رپورٹ کے مطابق رواں موسم سرما کے دوران اب تک کوئلے سے کاربن مونو آکسائیڈ کے اخراج کے باعث دم گھٹنے سے مزید 54 افراد کی موت واقع ہوچکی ہے۔
حکومت نے بوسیدہ عمارتوں میں مقیم افراد کو تلاش کرکے ان کی مدد کرنے کے لیے 8 ہزار 6 سو پولیس اہلکار تعینات کیے ہیں۔