نیپال میں ایک ٹانگ سے معذور مسلمان شخص نے ہندو انتہا پسندوں کے مشتعل ہجوم کے سامنے ڈٹ کر مسجد کا دفاع کرتے ہوئے بہادری اور عزم کی شاندار مثال قائم کر دی۔
سوشل میڈیا پر تیزی سے وائرل ہونے والی ایک ویڈیو میں دیکھا جا سکتا ہے کہ ایک ٹانگ سے معذور مسلمان شخص تنِ تنہا ہندو انتہا پسندوں کے ایک گروہ کے سامنے کھڑا ہے جو مسجد کو نقصان پہنچانے کی کوشش کر رہا تھا۔ یہ واقعہ نیپال میں منعقد ہونے والی ایک ہندو مذہبی تقریب کے دوران پیش آیا، جو بعد ازاں پُرتشدد صورت اختیار کر گئی۔
عینی شاہدین کے مطابق مشتعل ہجوم نے مسجد کو نشانہ بنانے اور اس پر حملہ کرنے کی کوشش کی، تاہم مقامی مسلمان شخص نے اپنی جان کی پروا کیے بغیر مسجد کے سامنے کھڑے ہو کر حملہ آوروں کو آگے بڑھنے سے روکنے کی کوشش کی۔
ایک ٹانگ سے معذور ہونے کے باوجود اس شخص نے خود کو انسانی ڈھال بنا لیا اور ہجوم کے سامنے ثابت قدمی سے کھڑا رہا، جس پر حملہ آور کچھ دیر کے لیے پسپا ہونے پر مجبور ہو گئے۔