ایڈیشنل آئی جی کراچی آزاد خان کی جانب سے نماز جمعہ کے موقع پر شہر قائد اور مرکزی راستوں پر سادہ لباس اور باوردی پولیس اہلکاروں کی تعیناتی کو یقینی بنانے کی ہدایت جاری کردی۔
آزاد خان نے کہا کہ نمازیوں کی سیکیورٹی کیلیے تمام تھانہ جات کی سطح پر رابطوں کے تحت ہر ممکن اقدامات کیے جائیں۔ گاڑیوں اور موٹر سائیکلوں کی پارکنگ مساجد اور امام بارگاہوں سے فاصلے پر یقینی بنائی جائے۔
پولیس ترجمان نے کہا کہ عوام کسی بھی مشکوک حرکت سرگرمی یا مشتبہ فرد/ افراد و لاوارث گاڑی، بیگ پارسل وغیرہ کی اطلاع فوری مددگار 15 یا قریبی موبائل تھانہ کو دیں۔
کراچی میں تعینات تمام سب ڈویژنل آفیسرز اور ایس ایچ اوز نماز جمعہ کے اختتام تک ازخود سیکیورٹی اقدامات کی نگرانی کریں گے۔ سیکیورٹی نفری کو نماز جمعہ کی ادائیگی کے دوران حفاظتی اقدامات کے پیش نظر ڈیوٹی مقام کو ہر گز نہ چھوڑنے کے احکامات جاری کیے گئے ہیں۔
شہر میں سیکیورٹی اقدامات پر عمل درآمد کے حوالے سے کسی بھی قسم کی لاپرواہی/کوتاہی پر سخت قانونی و محکمہ جاتی کارروائی عمل میں لائی جائے گی۔