صدر مملکت آصف علی زرداری نے بنگلا دیش کے عام انتخابات میں کامیابی حاصل کرنے والے طارق رحمان کو مبارکباد پیش کر دی۔
اپنے خصوصی تہنیتی پیغام میں صدر مملکت نے بنگلا دیش نیشنل پارٹی (بی این پی) کی بھاری اکثریت پر نیک خواہشات کا اظہار کیا اور کہا کہ یہ کامیابی عوام کے اعتماد کا مظہر ہے۔
صدر آصف علی زرداری نے بنگلا دیش میں پرامن اور شفاف انتخابات کے انعقاد پر وہاں کے عوام کو بھی مبارکباد دی اور دونوں ممالک کے درمیان مضبوط جمہوری شراکت داری کو مزید فروغ دینے کے عزم کا اعادہ کیا۔
انہوں نے مشترکہ ترقی، خوشحالی اور علاقائی استحکام کے لیے دوطرفہ تعاون بڑھانے پر زور دیتے ہوئے کہا کہ پاکستان بنگلا دیش کے ساتھ اپنے تعلقات کو مزید مستحکم اور فعال بنانے کا خواہاں ہے۔