شمال مشرقی امریکا میں آنے والے طاقتور برفانی طوفان نے معمولاتِ زندگی درہم برہم کر دیے شدید برفباری اور تیز ہواؤں کے باعث لاکھوں افراد بجلی سے محروم ہو گئے جبکہ ہزاروں پروازیں منسوخ کر دی گئیں۔
امریکی میڈیا کے مطابق ریاست رہوڈ آئی لینڈ میں 3 فٹ سے زائد برفباری ریکارڈ کی گئی جس نے کئی دہائیوں کا ریکارڈ توڑ دیا۔ گھروں، سڑکوں اور گاڑیوں پر برف کی موٹی تہہ جم گئی جس سے نقل و حمل کا نظام شدید متاثر ہوا۔
اسی طرح نیویارک کے معروف مقام سینٹرل پارک میں تقریباً 20 انچ برف ریکارڈ کی گئی۔ شہر کی سڑکیں، پارکس اور رہائشی علاقے مکمل طور پر برف کی سفید چادر میں ڈھک گئے، جبکہ شہریوں کو گھروں تک محدود رہنے کی ہدایت کی گئی ہے۔
ریاست میساچوسٹس میں شدید برفانی طوفان کے باعث ہنگامی حالت نافذ کر دی گئی ہے۔ حکام نے غیر ضروری سفر سے گریز اور حفاظتی تدابیر اختیار کرنے کی اپیل کی ہے۔
ایوی ایشن حکام کے مطابق ملک بھر میں 5600 سے زائد پروازیں منسوخ کی جا چکی ہیں جبکہ متعدد ہوائی اڈوں پر فلائٹ آپریشن شدید متاثر ہے۔ برفانی ہواؤں کے باعث رن ویز کی صفائی اور طیاروں کی روانگی میں مشکلات پیش آ رہی ہیں۔
شدید سردی اور تیز ہواؤں کے باعث لاکھوں صارفین بجلی سے محروم ہو گئے ہیں۔ امدادی ٹیمیں بجلی کی بحالی اور سڑکوں سے برف ہٹانے کے کام میں مصروف ہیں۔محکمہ موسمیات نے خبردار کیا ہے کہ برفباری اور شدید سردی کی لہر آئندہ چند روز تک جاری رہ سکتی ہے، جس سے مزید سفری مشکلات اور نظامِ زندگی متاثر ہونے کا خدشہ ہے۔