ترجمان وزارتِ خارجہ دفتر کے مطابق ڈپٹی وزیراعظم و وزیرِ خارجہ محمد اسحق ڈار نے جدہ میں او آئی سی کے ایگزیکٹو کمیٹی کے ہنگامی اجلاس کے موقع پر بنگلا دیش کے وزیرِ خارجہ ڈاکٹر خلیل الرحمن سے ملاقات کی۔
ڈپٹی وزیراعظم و وزیرِ خارجہ نے اپنے ہم منصب کو بنگلا دیش میں تاریخی اور پرامن اقتدار کی منتقلی پر مبارکباد دی اور عہدہ سنبھالنے پر بھی خوشی کا اظہار کیا۔
دونوں رہنماؤں نے تجارتی، ثقافتی، ٹیکنالوجی اور عوامی روابط سمیت متعدد شعبوں میں دوطرفہ تعاون بڑھانے پر تعمیری گفتگو کی۔ ملاقات کے دوران علاقائی امن، استحکام اور مشترکہ خوشحالی کے فروغ کے لیے مل کر کام کرنے کے عزم کو بھی دہرایا گیا۔
یہ ملاقات پاکستان اور بنگلا دیش کے تعلقات کو مزید مضبوط بنانے اور مستقبل میں قریبی تعاون کو فروغ دینے کا عکاس ہے۔