کراچی کے مختلف علاقوں میں سیکیورٹی انتظامات کے پیش نظر آج بھی کئی سڑکیں اور شاہراہیں بند ہیں جس کے باعث شہریوں کو ٹریفک جام کا سامنا ہے۔
ایم ٹی خان روڈ سے پی آئی ڈی سی روڈ اور مائی کولاچی روڈ ریلوے پھاٹک تک ٹریفک کے لیے بند ہے جس سے آئی آئی چندریگر روڈ پر بھی ٹریفک کی روانی شدید متاثر ہوئی ہے۔
بلاول ہاؤس اورکلفٹن سے جناح برج مائی کولاچی جانے والے ٹریفک کو بوٹ بیسن سے تین تلوارکا متبادل راستہ فراہم کیا گیا ہے جبکہ کلفٹن برج، میٹروپول، فوارہ چوک سے بائیں جانب شاہین کمپلیکس کا راستہ بھی اختیار کیا جا سکتا ہے۔
ٹریفک پولیس کا کہنا ہے کہ آئی سی آئی چوک ماڑی پور روڈ سے بوٹ بیسن جانے والے شہری جناح برج سے بائیں جانب آئی آئی چندریگر روڈ استعمال کریں اور آئی سی آئی چوک سے بائیں جانب کتیانہ میمن اسپتال سے نواب مہابت خانجی روڈ کا متبادل راستہ بھی فراہم کیا گیا ہے۔
شارع فیصل سے جناح برج جانے والوں کو پی آئی ڈی سی سے آئی آئی چندریگر روڈ اختیارکرنے کی ہدایت کی گئی ہے۔