وزیر اعظم شہباز شریف کی زیر صدارت پارلیمانی جماعتوں کے رہنماؤں اور نمائندگان کا اہم اجلاس شروع ہوگیا۔
اجلاس میں وزیراعظم پارلیمانی رہنماؤں کو پاکستان۔افغانستان صورتحال اور خطے، بالخصوص مشرقِ وسطیٰ و خلیجی ممالک میں حالیہ کشیدگی کے حوالے سے اعتماد میں لیں گے۔ اجلاس کے دوران شرکاء کو سیکیورٹی اور سفارتی امور پر تفصیلی بریفنگ بھی دی جائے گی۔
ذرائع کے مطابق اجلاس میں حالیہ علاقائی کشیدگی کے دوران پاکستان کی جانب سے کی جانے والی سفارتی کوششوں پر بھی روشنی ڈالی جائے گی اور آئندہ کے لائحہ عمل پر مشاورت کی جائے گی۔
اجلاس میں چیئرمین سینیٹ یوسف رضا گیلانی، اسپیکر قومی اسمبلی ایاز صادق، نائب وزیراعظم و وزیر خارجہ اسحاق ڈار، چیئرمین پاکستان پیپلز پارٹی بلاول بھٹو زرداری، سربراہ جمعیت علماء اسلام مولانا فضل الرحمٰن سمیت مختلف سیاسی جماعتوں کے رہنما اور وفاقی وزراء شریک ہیں۔
اجلاس کو موجودہ داخلی و خارجی صورتحال کے تناظر میں اہم قرار دیا جا رہا ہے۔