وزارت خارجہ کے ترجمان طاہر اندرابی نے کہا ہے کہ ایران کی موجودہ صورتحال کے پیش نظر حکومت پاکستان نے ایرانی سرزمین سے پاکستانی شہریوں کے انخلا اور خطے میں پھنسے پاکستانیوں کی مدد کے لیے فوری اور مؤثر اقدامات کیے ہیں۔
ترجمان کے مطابق وزارت خارجہ کا کرائسز مینجمنٹ یونٹ (CMU) چوبیس گھنٹے صورتحال کی نگرانی کر رہا ہے اور بیرون ملک مقیم پاکستانیوں کو ہر ممکن مدد فراہم کی جا رہی ہے۔
وزیراعظم کی ہدایات پر بیرون ملک پاکستانی سفارتخانوں میں خصوصی فسیلیٹیشن ڈیسک قائم کیے گئے ہیں، جہاں پھنسے ہوئے پاکستانیوں کو ویزا سہولت، سفری انتظامات اور دیگر ضروری معاونت فراہم کی جا رہی ہے۔ اس کے علاوہ سفارتخانوں کی جانب سے خصوصی ایپلی کیشنز، رجسٹریشن پورٹل اور ہیلپ لائنز بھی متعارف کرائی گئی ہیں تاکہ پاکستانی شہریوں سے بروقت رابطہ کیا جا سکے۔
وزارت خارجہ کے مطابق پاکستان کے سفارتی مشنز میزبان ممالک کی حکومتوں کے ساتھ قریبی رابطے میں ہیں تاکہ پاکستانی کمیونٹی کو قونصلر سہولیات فراہم کی جا سکیں۔
ترجمان نے مزید بتایا کہ فضائی رابطے کی جزوی بحالی کے بعد پھنسے ہوئے پاکستانی شہری کمرشل پروازوں کے ذریعے اپنی منزلوں کی جانب روانہ ہونا شروع ہوگئے ہیں۔
حکومت پاکستان نے بیرون ملک مقیم پاکستانیوں کے تحفظ اور ان کی محفوظ واپسی کو یقینی بنانے کے عزم کا اعادہ کیا ہے۔