پیٹرول اور ڈیزل کی قیمتوں میں حالیہ اضافے کے خلاف لاہور ہائیکورٹ میں درخواست دائر کر دی گئی ہے۔ درخواست میں وفاقی حکومت کے پیٹرول اور ڈیزل کی قیمت میں فی لیٹر 55 روپے اضافے کو چیلنج کیا گیا ہے۔
درخواست گزار نے مؤقف اختیار کیا ہے کہ یہ اضافہ غیرقانونی اور عوام دشمن اقدام ہے کیونکہ حکومت کے پاس 15 دن کا پیٹرولیم اسٹاک موجود ہونے کے باوجود قیمتیں بڑھائی گئی ہیں۔
درخواست میں عدالت سے استدعا کی گئی ہے کہ پیٹرولیم مصنوعات کی قیمتوں میں اضافے کو کالعدم قرار دیا جائے۔ مزید مؤقف میں کہا گیا ہے کہ قیمتوں میں اضافہ ٹرانسپورٹ، بجلی، زراعت اور اشیائے خور و نوش کی قیمتوں پر اثر ڈالے گا، جس سے عوام پر مزید مالی بوجھ پڑے گا۔
درخواست میں یہ بھی مطالبہ کیا گیا ہے کہ عدالت اوگرا اور وزارت توانائی کو 15 دن کے پیٹرولیم ذخائر کی تفصیلات عدالت میں پیش کرنے کا حکم دے۔