پیٹرولیم مصنوعات کی قیمتوں میں حالیہ اضافے کے بعد کراچی گڈز کیریئر ایسوسی ایشن نے ٹرانسپورٹ کرایوں میں 25 فیصد اضافہ کرنے کا اعلان کر دیا ہے۔
یہ فیصلہ کراچی گڈز کیریئر ایسوسی ایشن کے صدر ملک شیر خان اعوان کی صدارت میں منعقدہ کابینہ کے ہنگامی اجلاس میں کیا گیا جس میں تنظیم کے عہدیداران اور ایگزیکٹو ممبران نے شرکت کی۔
اجلاس میں نائب صدر چوہدری فیاض گجر، فنانس سیکرٹری غلام محمد آفریدی اور دیگر ایگزیکٹو ممبران نے پیٹرولیم مصنوعات کی بڑھتی ہوئی قیمتوں کے باعث ٹرانسپورٹ سیکٹر کو درپیش مشکلات پر تفصیلی غور کیا۔
کابینہ اجلاس میں مختلف تجاویز پیش کی گئیں جس کے بعد متفقہ طور پر گڈز ٹرانسپورٹ کے کرایوں میں 25 فیصد اضافہ کرنے کی منظوری دے دی گئی۔
اس موقع پر صدر کراچی گڈز کیریئر ایسوسی ایشن ملک شیر خان اعوان نے حکومت سے مطالبہ کیا کہ نیو لیوی اور کسٹم ڈیوٹی میں کمی کی جائے تاکہ عوام اور ٹرانسپورٹ برادری کو ریلیف مل سکے۔
تنظیم کے مطابق پیٹرولیم مصنوعات مہنگی ہونے کے باعث ٹرانسپورٹ اخراجات میں نمایاں اضافہ ہوا ہے، جس کے باعث کرایوں میں اضافہ ناگزیر ہو گیا ہے۔