بحرین کی انٹیلی جنس ایجنسی نے ایک بھارتی شہری کو اسرائیلی خفیہ ایجنسی موساد کو حساس معلومات فراہم کرنے کے الزام میں گرفتار کر لیا ہے۔ حکام کے مطابق ملزم سے تفتیش جاری ہے جبکہ معاملے کی مزید تفصیلات جلد سامنے آنے کا امکان ہے۔
میڈیا رپورٹس کے مطابق گرفتار ہونے والے شخص کی شناخت نتن موہن کے نام سے ہوئی ہے جو پیشے کے اعتبار سے ٹیلی کمیونیکیشن انجینئر بتایا جاتا ہے۔
ابتدائی اطلاعات کے مطابق ملزم نے حساس جغرافیائی معلومات، تصاویر اور ویڈیوز اسرائیلی خفیہ ایجنسی موساد کو فراہم کیں۔ ان معلومات میں بعض اہم اور اسٹریٹجک مقامات کی تفصیلات بھی شامل تھیں۔
رپورٹس کے مطابق یہ معلومات غیر ملکی انٹیلی جنس اداروں کے لیے اہداف کے تعین اور ان کے تجزیے میں مددگار ثابت ہو سکتی تھیں۔
دوسری جانب بحرین کی وزارتِ داخلہ نے اس گرفتاری کی تصدیق کر دی ہے، تاہم تفتیش اور تکنیکی پہلوؤں سے متعلق مزید تفصیلات ابھی جاری نہیں کی گئیں۔
حکام کا کہنا ہے کہ اس معاملے کی تحقیقات جاری ہیں اور مزید حقائق سامنے آنے کے بعد متعلقہ معلومات عوام کے ساتھ شیئر کی جائیں گی۔