مشرقِ وسطیٰ میں بڑھتی ہوئی کشیدگی اور عراق میں دو آئل ٹینکروں پر حملوں کی اطلاعات کے بعد عالمی منڈی میں تیل کی قیمتوں میں تیزی سے اضافہ ریکارڈ کیا گیا ہے۔
رپورٹس کے مطابق عراقی سمندری حدود کے قریب دو بین الاقوامی آئل ٹینکروں کو نشانہ بنائے جانے کے بعد عالمی سطح پر تیل کی فراہمی متاثر ہونے کے خدشات پیدا ہوگئے ہیں۔
اعداد و شمار کے مطابق برطانوی خام تیل (برینٹ) کی قیمت میں تقریباً 9 فیصد اضافہ ریکارڈ کیا گیا جس کے بعد اس کی قیمت 100.50 ڈالر فی بیرل تک پہنچ گئی۔ اسی طرح امریکی خام تیل کی قیمت میں بھی 8.57 فیصد اضافہ ہوا اور یہ 94.73 ڈالر فی بیرل تک جا پہنچی۔
ابتدائی ایشیائی تجارت کے دوران ویسٹ ٹیکساس انٹرمیڈیٹ (WTI) خام تیل کی قیمت بھی 7.5 فیصد اضافے کے ساتھ 93.80 ڈالر فی بیرل تک پہنچ گئی۔
توانائی کے ماہرین کے مطابق اگر خلیجی خطے خصوصاً آبنائے ہرمز کے اطراف کشیدگی برقرار رہی تو عالمی سطح پر تیل کی قیمتوں میں مزید اتار چڑھاؤ اور اضافہ دیکھنے میں آ سکتا ہے۔