چین میں ایک چھوٹی بچی کے ہاتھ میں موجود موبائل فون اچانک دھماکے سے پھٹ گیا جس کی ویڈیو سوشل میڈیا پر وائرل ہوگئی اور صارفین میں تشویش پیدا کردی۔
رپورٹس کے مطابق یہ واقعہ 9 مارچ کو پیش آیا اور گھر میں نصب سی سی ٹی وی کیمرے میں محفوظ ہو گیا۔ وائرل کلپ میں دیکھا جا سکتا ہے کہ بچی صوفے پر بیٹھی فون استعمال کر رہی تھی اور فون چارجر سے منسلک تھا۔ چند سیکنڈ بعد اچانک فون دھماکے سے پھٹ گیا جس کے باعث بچی کا توازن بگڑ گیا اور وہ صوفے سے نیچے گر گئی۔
خوش قسمتی سے بچی کو دھماکے سے کوئی ظاہری چوٹ نہیں آئی تاہم یہ واقعہ موبائل فون کے چارجنگ اور استعمال کے دوران احتیاطی اقدامات کی اہمیت کو اجاگر کرتا ہے۔
ماہرین کے مطابق دنیا بھر میں موبائل فون کے پھٹنے یا حد سے زیادہ گرم ہونے کے واقعات میں حالیہ برسوں میں تشویشناک اضافہ دیکھا گیا ہے، خاص طور پر جب فون استعمال کے دوران یا چارجنگ پر ہوتا ہے۔