امریکی محکمہ خارجہ نے ایران کے اہم رہنماؤں کے بارے میں معلومات فراہم کرنے پر ایک کروڑ ڈالر تک انعام دینے کا اعلان کر دیا ہے۔
امریکی محکمہ خارجہ کے ریوارڈز فار جسٹس پروگرام کی جانب سے جاری بیان میں کہا گیا ہے کہ ایران کی چند اہم شخصیات کے بارے میں معلومات درکار ہیں جن میں ایرانی سپریم لیڈر مجتبیٰ خامنہ ای بھی شامل ہیں۔
بیان کے مطابق درست اور قابلِ اعتماد معلومات فراہم کرنے والے افراد کو ایک کروڑ امریکی ڈالر تک انعام دیا جا سکتا ہےجبکہ بعض صورتوں میں معلومات دینے والوں کو امریکا منتقل ہونے کی سہولت بھی فراہم کی جائے گی۔
امریکا کی جانب سے جن ایرانی رہنماؤں کے بارے میں معلومات طلب کی گئی ہیں ان میں ایرانی وزیرِ انٹیلی جنس اسماعیل خطیب، نائب چیف آف اسٹاف علی اصغر حجازی، میجر جنرل یحییٰ رحیم صفوی، بریگیڈیئر جنرل اسکندر مومنی اور سپریم کونسل کے سیکریٹری علی لاریجانی بھی شامل ہیں۔
دوسری جانب علی لاریجانی آج تہران میں یومِ القدس کی ریلیوں میں شریک ہوئے اور اپنی شرکت کی تصاویر بھی سوشل میڈیا پر جاری کیں۔