وزارت اطلاعات ونشرعات نے افغان طالبان کی جانب سے جنوبی وزیرستان کے علاقے وانا میں مبینہ حملے کے دعوے کو مسترد کرتے ہوئے اسے جھوٹا اور گمراہ کن قرار دے دیا ہے۔
وزارتِ اطلاعات کے جاری کردہ فیکٹ چیک کے مطابق سوشل میڈیا پروزارت اطلاعات طالبان کے نام سے ایک اکاؤنٹ کی جانب سے دعویٰ کیا گیا تھا کہ وانا میں کامیاب حملہ کیا گیا ہے۔
وزارت کے مطابق حقیقت یہ ہے کہ ساوتھ وزیرستان میں ایک ابتدائی نوعیت کے ڈرون کو سافٹ کِل اقدامات کے ذریعے تباہ کر دیا گیا اور اس واقعے میں کسی فوجی تنصیب یا انفراسٹرکچر کو کوئی نقصان نہیں پہنچا۔
فیکٹ چیک میں مزید کہا گیا ہے کہ طالبان حکومت اس سے قبل بھی اس نوعیت کے بے بنیاد دعوے کرتی رہی ہے، جن میں پاکستان فضائیہ کے طیارے مار گرانے اور پائلٹ گرفتار کرنے جیسے دعوے شامل ہیں، اس لیے ان کے بیانات قابلِ اعتماد نہیں۔
وزارتِ اطلاعات نے واقعے سے متعلق ملبے کی تصویر بھی جاری کی ہے اور کہا ہے کہ حقیقت ہمیشہ جھوٹ پر غالب آتی ہے۔