پی آئی اے کی نجکاری کے عمل میں شامل جائیدادوں کی تفصیلات جاری

حکومت کی جانب سے پی آئی اے کی نجکاری کے عمل میں شامل جائیدادوں کی تفصیلات جاری کردی گئی ہیں، جن کے مطابق اس ڈیل میں مجموعی طور پر 11 پراپرٹیز شامل ہیں جن میں سے 7 بیرونِ ملک واقع ہیں۔ دستاویزات کے مطابق ان جائیدادوں کی مجموعی مالیت تقریباً 12 ارب روپے بتائی گئی ہے۔

دستاویزات کے مطابق پی آئی اے کی نیو دہلی اور ممبئی میں بھی جائیدادیں موجود ہیں جن کی مجموعی مالیت 36 کروڑ روپے سے زائد ہے۔ نئی دہلی میں واقع پراپرٹی کی مالیت مقامی کرنسی میں 121.9 ملین روپے جبکہ ممبئی میں موجود پراپرٹی کی مالیت 112.5 ملین روپے بتائی گئی ہے۔

اسی طرح نیویارک میں پی آئی اے کی ایک پراپرٹی کی مارکیٹ ویلیو 193,500 ڈالر جبکہ Amsterdam میں تین جائیدادوں کی مجموعی مالیت 343,500 یورو بتائی گئی ہے۔

دستاویزات کے مطابق 11 میں سے چار جائیدادیں پاکستان میں واقع ہیں جن کی مجموعی تخمینہ مالیت تقریباً 11.4 ارب روپے ہے۔ ان میں پشاور میں پی آئی اے سیلز آفس کی عمارت شامل ہے جس کی مالیت 5.56 ارب روپے ہے، جبکہ راولپنڈی کی مال روڈ پر واقع پراپرٹی کی مالیت 2.54 ارب روپے بتائی گئی ہے۔

اس کے علاوہ اسلام آباد کے بلیو ایریا میں واقع سیلز آفس کی قیمت 2.67 ارب روپے جبکہ کوئٹہ میں موجود پراپرٹی کی مالیت 915.7 ملین روپے بتائی گئی ہے۔

دستاویزات کے مطابق پی آئی اے کے اثاثوں میں Roosevelt Hotel اور Hotel Scribe Paris Opera by Sofitel بھی شامل ہیں، جبکہ Uzbekistan میں موجود پراپرٹی کی مالیت مقامی کرنسی کے حساب سے تقریباً 4 ارب سوم بتائی گئی ہے۔