پاکستان ریلویز نے عید الفطر کے موقع پر مسافروں کی سہولت کے لیے چار خصوصی ٹرینیں چلانے کا اعلان کر دیا ہے تاکہ عید کے دنوں میں شہریوں کو آرام دہ اور آسان سفر کی سہولت فراہم کی جا سکے۔
ذرائع کے مطابق عید الفطر کے موقع پر ملک بھر میں سفر کرنے والے مسافروں کی بڑھتی ہوئی تعداد کو مدنظر رکھتے ہوئے پاکستان ریلویز نے چار عید اسپیشل ٹرینیں چلانے کا فیصلہ کیا ہے۔ یہ ٹرینیں ملک کے مختلف شہروں سے روانہ ہوں گی تاکہ شہری باآسانی اپنے آبائی علاقوں تک پہنچ سکیں۔
پاکستان ریلویز کی جانب سے جاری بیان کے مطابق پہلی عید اسپیشل ٹرین 16 مارچ کو لاہور سے کراچی کے لیے روانہ ہوگی۔ دوسری عید اسپیشل ٹرین 17 مارچ کو کوئٹہ سے راولپنڈی کے لیے چلائی جائے گی۔
اسی طرح تیسری عید اسپیشل ٹرین 17 مارچ کو کراچی سے پشاور کے لیے روانہ ہوگی، جبکہ چوتھی عید اسپیشل ٹرین 18 مارچ کو کراچی سے لاہور کے لیے روانہ کی جائے گی۔
پاکستان ریلویز کا کہنا ہے کہ عید اسپیشل ٹرینیں چلانے کا مقصد مسافروں کو زیادہ سے زیادہ سہولت فراہم کرنا اور عید کے دنوں میں سفر کو آسان بنانا ہے تاکہ لوگ بغیر کسی مشکل کے اپنے اہلِ خانہ سے ملاقات کر سکیں اور محفوظ طریقے سے اپنی منزل تک پہنچ سکیں۔