مشرقی چین کے صوبے ژجیانگ سے تعلق رکھنے والی 102 سالہ خاتون جن باؤ لینگ اپنی لمبی عمر، اچھی صحت اور خوش مزاج طبیعت کے باعث مقامی لوگوں کی توجہ کا مرکز بن گئی ہیں۔ حیرت انگیز طور پر وہ اس عمر میں بھی ذہنی طور پر چاق و چوبند اور جسمانی طور پر کافی حد تک صحت مند ہیں۔
مشرقی چین کے صوبے ژجیانگ کے علاقے تانیژو سے تعلق رکھنے والی 102 سالہ جن باؤ لینگ اپنے علاقے میں طویل عمر اور خوش مزاج شخصیت کے باعث خاصی معروف ہیں۔
ان کے بیٹے ہو ہوامی کے مطابق حیران کن بات یہ ہے کہ گزشتہ تقریباً 50 برسوں کے دوران جن باؤ لینگ کو کبھی اسپتال جانے کی ضرورت پیش نہیں آئی۔ 102 سال کی عمر میں بھی ان کی ذہنی چستی برقرار ہے جبکہ مجموعی طور پر ان کی صحت بھی اچھی سمجھی جاتی ہے۔
جن باؤ لینگ کی روزمرہ زندگی بھی خاصی منفرد ہے۔ وہ عموماً صبح تقریباً 9 بجے بیدار ہوتی ہیں، نہانے کے بعد اپنے باغ میں جا کر دھوپ سے لطف اندوز ہوتی ہیں اور شام تقریباً 7 بجے سونے کے لیے چلی جاتی ہیں۔ اس کے علاوہ وہ دن بھر میں کئی بار چند منٹ کے لیے قیلولہ بھی کرتی ہیں اور مجموعی طور پر دن میں تقریباً 15 گھنٹے نیند لیتی ہیں۔
ان کے کھانے پینے کی عادات بھی دلچسپ ہیں۔ وہ دوپہر اور رات کے کھانے میں زیادہ تر نوڈلز یا چاول کھانا پسند کرتی ہیں جبکہ گوشت بھی انہیں پسند ہے۔ اس کے ساتھ ساتھ کیک اور چائے بھی ان کی پسندیدہ غذاؤں میں شامل ہیں، جن میں براؤن چینی اور کھجوروں کا استعمال کیا جاتا ہے۔ ان کی روزانہ کی خوراک میں دو انڈے اور تین مالٹے بھی شامل ہوتے ہیں، تاہم سبزیاں انہیں زیادہ پسند نہیں۔
اگرچہ بڑھتی عمر کے باعث ان کی ٹانگوں کے جوڑ اب پہلے کی طرح لچکدار نہیں رہے اور چلنے کے لیے انہیں مدد درکار ہوتی ہے، تاہم ان کی بینائی اب بھی اچھی ہے اور ہاتھ بھی درست طریقے سے کام کرتے ہیں۔ یہی وجہ ہے کہ وہ اب بھی سلائی کرنے کی صلاحیت رکھتی ہیں۔
جن باؤ لینگ کی زندگی اس حقیقت کی یاد دہانی کراتی ہے کہ متوازن طرز زندگی اور خوش مزاج طبیعت طویل عمر اور بہتر معیارِ زندگی میں اہم کردار ادا کر سکتے ہیں۔