وزارتِ خارجہ پاکستان نے امریکی عہدیدار کے پاکستان کے میزائل پروگرام سے متعلق بیان کو مسترد کرتے ہوئے واضح کیا ہے کہ پاکستان کی تزویراتی صلاحیتیں مکمل طور پر دفاعی نوعیت کی حامل ہیں۔
ترجمان دفتر خارجہ طاہر اندرابی کے مطابق پاکستان کی میزائل صلاحیتوں کو ممکنہ خطرہ قرار دینا بے بنیاد دعویٰ ہے۔ انہوں نے کہا کہ پاکستان کا میزائل پروگرام “قابلِ اعتبار کم از کم بازدار قوت” کے اصول پر قائم ہے، جس کا مقصد قومی خودمختاری کا تحفظ اور خطے میں امن برقرار رکھنا ہے۔
ترجمان نے مزید کہا کہ پاکستان کی میزائل حدِ مار بین البراعظمی سطح سے کم ہے، جبکہ بھارت کی جانب سے 12 ہزار کلومیٹر سے زائد حدِ مار رکھنے والے میزائلز کی ترقی خطے اور اس سے باہر کے لیے تشویش کا باعث ہے۔
دفتر خارجہ کے مطابق امریکا کے ساتھ تعلقات کو باہمی احترام، عدم امتیاز اور حقائق پر مبنی بنیادوں پر آگے بڑھانے کے لیے پاکستان پرعزم ہے، اور خطے میں امن و استحکام کے لیے متوازن پالیسی کی ضرورت پر زور دیا گیا ہے۔