اسرائیلی وزیراعظم نیتن یاہو نے ایران کے جوابی حملوں کے بعد صورتحال کو اسرائیل کے لیے انتہائی مشکل شام قرار دے دیا۔
سوشل میڈیا پر جاری اپنے بیان میں اسرائیلی وزیراعظم نے کہا کہ مشکل حالات کے باوجود کارروائیاں جاری رکھی جائیں گی اور یہ اسرائیل کے مستقبل کی جنگ ہے۔
میڈیا رپورٹس کے مطابق ایران نے جنوبی اسرائیل کے شہروں دیمونا اور عراد پر میزائل حملے کیے، جن کے نتیجے میں کم از کم 6 افراد ہلاک اور 150 سے زائد زخمی ہوئے جبکہ متعدد عمارتیں تباہ ہو گئیں۔
حملوں کے بعد اسرائیلی حکومت نے ملک بھر میں تعلیمی ادارے بند کرنے کا اعلان کر دیا ہے۔ وزارت تعلیم کے مطابق اتوار اور پیر کو طلبہ اور عملے کو تعلیمی اداروں میں نہ آنے کی ہدایت کی گئی ہے۔
رپورٹس کے مطابق ایران کی جانب سے یہ حملے نطنز میں موجود جوہری تنصیبات پر امریکا اور اسرائیل کی کارروائیوں کے ردعمل میں کیے گئے۔
اسرائیلی میڈیا کے مطابق عراد میں ہونے والے حملے میں بھی متعدد ہلاکتوں اور سو سے زائد زخمیوں کی تصدیق کی گئی ہے جبکہ سیکیورٹی خدشات کے باعث ملک بھر میں ہائی الرٹ جاری کر دیا گیا ہے۔