ایران میں جاری جنگ اور خراب معاشی حالات کے دوران ایک مقامی سپر مارکیٹ انسانیت اور یکجہتی کی علامت بن گئی جہاں دکاندار کے ایک سادہ پیغام نے سوشل میڈیا پر دھوم مچا دی۔
سپر مارکیٹ کے باہر آویزاں ہاتھ سے لکھے گئے بورڈ پر درج تھا "جتنی ضرورت ہو لے جائیں، جنگ کے بعد ادائیگی کر دیں"۔ یہ پیغام دیکھتے ہی دیکھتے وائرل ہو گیا اور عوام کی توجہ کا مرکز بن گیا۔
رپورٹس کے مطابق حالیہ کشیدگی اور مہنگائی کے باعث ایران میں اشیائے خورونوش کی فراہمی متاثر ہوئی ہے جس سے شہریوں کو شدید مشکلات کا سامنا ہے۔ ایسے حالات میں دکاندار کا یہ اقدام نہ صرف انفرادی مدد بلکہ معاشرتی یکجہتی کی ایک بڑی مثال بن کر سامنے آیا ہے۔
ماہرین کے مطابق یہ عمل ایران کی "وال آف کائنڈنس" جیسی روایت کی جدید شکل ہے جہاں لوگ ضرورت مندوں کے لیے کھانا اور کپڑے چھوڑ جاتے ہیں۔ یہ روایت مشکل وقت میں باہمی تعاون اور ہمدردی کی عکاسی کرتی ہے۔