پشاور ہائیکورٹ نے افغان مہاجرین کی بے دخلی کے خلاف دائر درخواستوں پر سماعت کرتے ہوئے 12 افغان شہریوں کی عارضی بے دخلی روک دی ہے۔
عدالت نے کیس کی مزید سماعت 14 روز کے لیے ملتوی کرتے ہوئے وزارت سیفران سے جواب طلب کر لیا۔ سماعت کے دوران ایف آئی اے نے عدالت میں اپنا جواب جمع کرایا جبکہ ایڈیشنل اٹارنی جنرل نے وزارت سیفران کی جانب سے جواب جمع کرانے کے لیے مہلت طلب کی جسے عدالت نے منظور کر لیا۔
درخواست گزاروں کے وکیل نے مؤقف اختیار کیا کہ تمام افغان شہری خراسان کیمپ میں مقیم ہیں اور انہوں نے اقوام متحدہ کے ادارہ برائے مہاجرین سے رہائش کے لیے رجوع کر رکھا ہے۔ وکیل کے مطابق درخواست گزاروں کی اپیلیں یو این ایچ سی آر میں زیر التوا ہیں لہٰذا حتمی فیصلے تک انہیں ڈی پورٹ نہ کیا جائے۔
عدالت نے دلائل سننے کے بعد درخواست گزاروں کو عبوری ریلیف دیتے ہوئے ان کی بے دخلی عارضی طور پر روکنے کا حکم جاری کیا۔