سپریم کورٹ نے وزیرِ اعظم شہباز شریف کی جانب سے بانی پی ٹی آئی عمران خان کے خلاف دائر ہتکِ عزت کیس میں عمران خان کے حقِ دفاع سے متعلق نظرثانی اپیل سننے کے لیے نیا تین رکنی بینچ تشکیل دے دیا ہے۔
اس سے قبل اس مقدمے کی سماعت جسٹس عائشہ ملک کی سربراہی میں قائم تین رکنی بینچ کر رہا تھا، تاہم اب بینچ تبدیل کر دیا گیا ہے۔
یاد رہے کہ بانی پی ٹی آئی نے ٹرائل کورٹ کی جانب سے حقِ دفاع ختم کیے جانے کے فیصلے کے خلاف سپریم کورٹ سے رجوع کیا تھا۔ اس درخواست پر پہلے سابق جج جسٹس منصور علی شاہ کی سربراہی میں قائم تین رکنی بینچ نے سماعت کی تھی اور درخواست مسترد کر دی تھی۔
بعد ازاں بانی پی ٹی آئی نے اسی فیصلے کے خلاف سپریم کورٹ میں نظرثانی اپیل دائر کر رکھی ہے، جس کی سماعت کے لیے اب نیا بینچ تشکیل دے دیا گیا ہے۔
قانونی ماہرین کے مطابق نیا بینچ اس بات کا جائزہ لے گا کہ آیا بانی پی ٹی آئی کو مقدمے میں دفاع کا مکمل موقع فراہم کیا گیا یا نہیں۔