لاہور کے لیڈی ولنگڈن اسپتال میں طبی اخلاقیات کی سنگین خلاف ورزی سامنے آنے کے بعد محکمہ صحت پنجاب نے فوری کارروائی کرتے ہوئے چار لیڈی ڈاکٹرز کو معطل کر دیا ہے۔
ذرائع کے مطابق اسپتال کے آپریشن تھیٹر میں ڈاکٹرز نے مبینہ طور پر ایک دوسرے سے مقابلہ کیا کہ کون پہلے آپریشن مکمل کرتا ہے، جس دوران مریضوں کی جان کو خطرہ لاحق ہوا۔ اس پورے واقعے کی ویڈیو بھی بنائی گئی، جسے مریض کے وقار اور طبی ضابطہ اخلاق کی کھلی خلاف ورزی قرار دیا گیا ہے۔
محکمہ صحت کے سیکرٹری عظمت محمود نے واقعے کا فوری نوٹس لیتے ہوئے چار ڈاکٹرز ڈاکٹر طیبہ فاطمہ، ڈاکٹر ماہم امین، ڈاکٹر زینب طاہر اور ڈاکٹر عائشہ افضل کو معطل کرنے کے احکامات جاری کیے اور انہیں اسپیشلائزڈ ہیلتھ کیئر ڈیپارٹمنٹ کو رپورٹ کرنے کی ہدایت دی۔
ساتھ ہی اسپتال کی ایم ایس فرح انعام اور ایچ او ڈی پروفیسر عظمیٰ حسین سے تین روز کے اندر تحریری جواب طلب کر لیا گیا ہے۔
صوبائی وزیر صحت خواجہ سلمان رفیق نے واقعے کی سخت مذمت کرتے ہوئے اسے انتظامی ناکامی قرار دیا اور کہا کہ اسپتال کے ایس او پیز پر کوئی سمجھوتہ نہیں کیا جائے گا۔ غیر تسلی بخش جواب کی صورت میں مزید سخت قانونی کارروائی کی جائے گی۔