نائب وزیراعظم اور وزیر خارجہ اسحاق ڈار نے کہا ہے کہ آبنائے ہرمز سے پاکستانی پرچم بردار مزید 20 جہازوں کو گزرنے کی اجازت دے دی گئی ہے۔
سماجی رابطے کی ویب سائٹ ایکس پر جاری اپنے بیان میں اسحاق ڈار نے بتایا کہ روزانہ 2 پاکستانی جہاز آبنائے ہرمز عبور کریں گے۔
انہوں نے اس پیشرفت کو خوش آئند قرار دیتے ہوئے کہا کہ ایران کا یہ اقدام تعمیری اور قابلِ تحسین ہے۔
اسحاق ڈار نے اپنی پوسٹ میں امریکی نائب صدر جے ڈی وینس، امریکی وزیر خارجہ مارکو روبیو، امریکی نمائندہ خصوصی اسٹیو ووٹکوف اور ایرانی وزیر خارجہ عباس عراقچی کو بھی ٹیگ کیا۔
وزیر خارجہ کا کہنا تھا کہ یہ پیشرفت خطے میں امن اور استحکام کے فروغ کے لیے اہم ثابت ہوسکتی ہے اور یہ مثبت اعلان امن کی جانب ایک اہم قدم ہے، جو اجتماعی کوششوں کو مزید مضبوط بنائے گا۔
انہوں نے مزید کہا کہ مذاکرات، سفارتکاری اور اعتماد سازی ہی آگے بڑھنے کا واحد اور مؤثر راستہ ہیں۔