اقوام متحدہ کی سلامتی کونسل میں آبنائے ہُرمز کھلوانے سے متعلق پیش کی گئی قرارداد روس اور چین نے ویٹو کر دی، جس کے باعث قرارداد منظور نہ ہوسکی۔
عرب میڈیا رپورٹس کے مطابق بحرین کی جانب سے پیش کردہ قرارداد پر غور کے لیے سلامتی کونسل کا اہم اجلاس منعقد ہوا، جس میں ووٹنگ کے دوران قرارداد کے حق میں 11 ووٹ آئے۔
رپورٹس کے مطابق روس اور چین نے قرارداد کی مخالفت کرتے ہوئے ویٹو کا اختیار استعمال کیا، جبکہ پاکستان اور کولمبیا نے ووٹنگ میں حصہ نہیں لیا۔
میڈیا ذرائع کے مطابق اگر یہ قرارداد منظور ہو جاتی تو اقوام متحدہ کے رکن ممالک کو آبنائے ہُرمز میں بحری آمدورفت بحال کرانے کے لیے ضروری اقدامات کی اجازت مل جاتی۔
آبنائے ہُرمز عالمی تجارت، خصوصاً تیل اور توانائی کی ترسیل کے لیے نہایت اہم سمندری گزرگاہ سمجھی جاتی ہے، اس لیے قرارداد کی ناکامی کو عالمی سطح پر ایک اہم سفارتی پیش رفت قرار دیا جا رہا ہے۔